Hazrat Ibrahim (as)

1. Riwayat:
Sab se pehle jis shakhs ne mimbar par khutba diya wo H. Ibrahim (as) the...
(Meezan ul Hikmah, v3, p97)

2. Imam Sadiq (as):
Sab se pehle jis shakhs ne joota (shoes) istemaal kiya, wo H. Ibrahim (as) the.
(Tehzeeb e Aal e Muhammad (as), p43)

3. Imam Taqi (as):
Pehle 2 shakhs jinhone roo e zameen par aapas mein Musafeha kiya wo H. Zulqarnain (as) aur H. Ibrahim (as) hain. H. Ibrahim (as) ne H. Zulqarnain (as) ka isteqbaal kiya aur unse musafeha farmaya.
(Amaali - Shaikh Toosi, v2, p173)

4. Rasule Khuda (saww):
Sab se pehle jisne Raah e Khuda mein jung ki wo H. Ibrahim (as) the. Jab H. Lut (as) ko Rome walo'n ne qaid kar liya tha to H. Ibrahim (as) ne unse jung kar ke J. Lut (as) ko unke chungal se chhudaya tha.
(Meezan ul Hikmah, v2, p206)

5. Riwayat:
Pehle jis ne Qaatil e Husain ibne Ali (as) par La'nat ki H. Ibrahim Khaleelullah (as) the aur unhone hukm kiya apne farzando'n ko aur unse ahed o paImaan (promise) liya ki hamesha is mal'oon par la'nat karein. H. Ibrahim (as) ke baad H. Musa (as) ne uspar La'nat ki aur apni ummat ko hukm kiya ke la'nat karein. Unke baad H. Dawood (as) ne La'nat ki aur Bani Israel ko hukm kiya ke oos shaqi par La'nat karein. Unke baad H. Isa (as) ne oos par La'nat ki….
(Bihaar ul Anwaar, v1, p133)

6. Imam Baqir (as):
Log J. Ibrahim (as) ke zamane mein bagair kisi marz ke achaanak mar jaate the. Hazrat ne Dua ki, "Parwardigaara, Maut ki koi bimari qaraar de taaki beemar isme Sabr ka sawaab paaye aur Ayaadat karne wale (uski mulaqat karne wale) usko masaaib par Sabr karne ke liye tasalli aur dilaasa de." Pus, Khuda ne pehle Bukhaar (fever) ko naazil farmaya aur uske baad doosri bimariyo'n ko.
(Furoo e Kafi, v1, p270)

7. Imam Sadiq (as):
J. Ibrahim Khaleelullah ne Khuda Wande Aalam se Dua ki thi ke wo unko ek beti ataa farmaye jo unki maut par girya o buka kare.
(Wasaail ush Shia, v2, p289)

Waledain

★Waledain
1. Khuda ne 3 cheezo me kisi ko koi chut nahi di.
i) Amanat me khayanat na karo bhale se nek shakhs ki ho ya bure.
ii) Apna ahad (wada) pura karo bhale se nek aadmi ho ya bura.
iii) Waledain se neki karo bhale se mushrik hi kyu na ho.
Waledain ke saath neki karna, unke marne ke baad bhi, taqeed kiyi gayi hai.
(Al-Kaafi, vol 2, 162; Mafateehul hayat (Urdu Edition), Page 206)

2. Imam Baqir (as):
4 sifaat aisi hai ke agar in mese ek momin me payi jaye to khuda use Jannat me bahtarin martaba ata karta hai aur Jannat ke tamam bahtarin mahallo me aur aalitarin sharaf ke mahal par fayez karta hai:
1) Jo maa baap par kharch karta ho.
2) Un k saath accha bartao(behaviour) karta hai.
3) Un dono k saath neki karta ho.
4) Un dono ko ghamgin na karta ho.
(Al-amaali, (lil Mufeed), 167; Mafateehul hayat (Urdu Edition), Page 207)

3. Allah farmata hai:-
Mera shukr baja lao aur waledain ka bhi shukria ada karo.
(Al-Fiqh almansub elal Imam ar Redha alyhis salam, page 334; Mafateehul hayat (Urdu Edition), Page 210)

★Maa ka Haq
1. Imam Sajjad (as):
Teri Maa ne tujhe is tarah uthaya ke kisi aur ne tujhe nahi uthaya. Isne apne samareye qalb (dudh) se jo kuch ata kiya wo kisi ne nahi ata kiya. Us ne apne tamam aazaye badan(body parts) se teri khidmat ki. Wo khud bhuki rahi aur tujhe gaza (khana) deti thi, ya khud pyasi thi lekin tujhe us ne seer’aab kiya, ya khud uryaan thi aur tujhe libas diya, khud dhup me thi aur tujhe saaye ke neeche bithaya. Wo khud nahi soti thi. Usne tujhe garmi wa sardi se majfuz rakha taki tum bade ho kar uske ho jao.
Jaan lo! Ki tum us ke shukria ada karne ki qudrat nahi rakhte siwaye khuda ki taufeeq aur uski madad se.
(Man la yahdhurul faqih, vol 2, 621; Mafateehul hayat (Urdu Edition), Page 208)

2. Imam Reza (as):
Ne Maa ke haq ke muqaddam hone ke baare me farmaya:-
Maa ka haq lazim tarin aur wajib tarin huquq me se hai.
Kyuki Maa bacche ko is tarah uthati hai ke koi dusra use nahi utha sakta. Har lehaz se us ki khidmat aur hifazat karti hai, har haal me Maa khush hoti hai, pas wo baccho ko badi sakhti se paalti hai aur sabr karti hai, khud  bhukhi rahti hai baccho ko seer karti hai, khud pyasi rahti hai baccho ko seer’aab karti hai, khud dhup me hoti hai aur bacche ko saaye me rakhti hai. Agar che Maa ka pura haq ada karne ki insaan me taqat nahi hai lekin jitna mumkin ho sake us k haq ko ada kare.

★Baap ka maqaam
1. Rasul e Khuda (sawa):
Khuda ki rizayat baap ki reza ke saath hai aur Allah ka ghazab bhi baap ka ghazab hota hai.
(Nahjul Fasahah, 502; Mafateehul hayat (Urdu Edition), Page 211)

2. Imam Sajjad (as):
Baap ka haq ye hai ke tu itna jaan le ke wo teri jad (root) hai. Aur tu uski shaakh (branch), jaan le ke agar wo na hota to tu bhi na hota. Pas jab bhi tujhe nemat mile khush raho. Tera baap jo teri jad hai ek nemat hai. Khuda ki hamd baja la aur nemat k barabar us ka shukr ada karo.
(Tohof al uqool, page 263; Mafateehul hayat (Urdu Edition), Page 211)

★Waledain ki ita'at
1. Allah (swt):
Quran me Sura e Israel (ayat 23) me fermata hai:
(Khabardar waledain k jawab me) uff tak na kahna
aur na un ko jhidakna
aur (jo kuch kahna sun’na ho to) bohot adab se kaha karo.
(Mafateehul Hayaat(Urdu Edition), Page 213)

Sil e Raham/Qat e Raham

🌺Sile Raham 🌺

1. Sile Rahmi ka kya matlab hai?
Sile Rahmi is ka naam nahi k insaan ristedaro k ghar jaye balke us k kai tarike hai. Is ka kamil misdaq (bahtarin maana)  ye hai k dusro se pahle rishtedaro ki zarurat ko pura kare…
(Man la yahdhurul  faqih, vol 2, 68) aur unhe khush rakhe….
(Tasneem, vol 2, page 560)

Sile Rahmi rishtedaro ki shaan ke mutanasib ho. Jaise unhe salam karna ya salam ka accha jawab dena, rishtedaro ko takleef na dena, unhe salam karna aur unka ehteram karna, khana khilana, bimaar ki ayadat k liye jana, unke yaha agar koi aza ka program ho to us me shirkat karna….  
(Al-Kaafi, vol 2 219),
un ka didar karne jana, gift/hadiya dena.
(Mafateehul hayat (Urdu Edition), Page 201)

2. Rasule Khuda(sawa):
Kya mai aap sab ko us shakhs ke baare me batau jo duniya aur aakherat ke bartarin (behtar/achha) insano me se hai?
Logo ne jawab diya: Ji.
Aap ne farmaya:
“Wo hai jo connection (rishtedari) cut karne (todne) wale se connection (rishtedari) banaye rakhe.
(Az-zohad, page 39, Mafatihul Hayaat, Page 210)

3. Rasule Khuda (sawa):
Meri saari ummat ko (jo hazir hai aur jo gaaeb hai) aur un logo ko jo roze qayamat tak apne baap ki sulbo me hai aur maa ki kokh (rahm) me hai,
“Sile Raham ki sifarish karta hu”, bhale hi in do shakhso ko (jo Sile Raham kar rahe hai) ek saal ka safar (travel) kyu na karna padhe, aur ye deen e islaam me se hai.
(Al-Kaafi, vol 2, Page 151, Mafatihul Hayaat, Page 211)

4. Imam Reza (as):
Khuda ne 3 cheezo ko 3 cheezo k saath rakha hai,
1) Namaz aur Zakat ko.
Khuda ne farmaan diya ki jo koi bhi Zakat ada na kare uski namaaz qabul nahi hogi.
2) Shukre Khuda aur Shukre Waledain ko.
Khuda ne amr kiya ki jo koi bhi shukre waledain ada na kare usne shukre khuda ada nahi kiya.
3) Khuda ka Taqwa aur Sile Raham ko.
Khuda ne farmaan diya ki jo koi bhi Sile Raham anjaam na de Khuda ke taqwa ka dhyaan nahi rakha.
(Kitab al Khisaal, page 156, Mafatihul Hayaat, Page 210)

5. Rasule Khuda (sawa):
Jo chahta hai ki uski maut me takhir aur
rozi me wusat/izafa ho to use chahiye ki taqwa ikhtiyaar kare aur Sile Rahami kare.
(Az-zohad, page 39, Mafatihul Hayaat, Page 211)

6. Rasule Khuda (sawa):
Agar kisi ki umr me se sirf 3 saal bache rahte ho to Sile Rahami karne se Khuda uski umr ko 33 saal kar deta hai.
(Tafseer al Ayashi, vol 2, Page 220, Mafatihul Hayaat, Page 212)

7. Rasule Khuda (sawa):
Jo bhi mujhe ek amal ki zamanat deta hai, mai uske 4 cheezo ki zamanat duga,
jo bhi Sile Rahami karega
●Mai usko dost rakhta hu,
●uski rozi me izafa karta hu,
●uski umr tulaani karta hu aur
●Jannat me bhejuga.
(Uyun Akhbar ar Reza, vol 2, Page 37, Mafatihul Hayaat, Page 212)

8. Imam Baqir (as):
Sile Rahami
●Amaal ki pakizgi 
●Maal me rushd (izafa/badhna)
●Bala (mushkilaat) ko dur karne
●Hisaab ko aasan karne aur
●Maut me deri ka mujib(reason) hai.
(Al-Kaafi, vol 2, Page 150, Mafatihul Hayaat, Page 212)

9. Hazrat Musa (as) ne Khuda se pucha:
Jo Sile Rahami karta hai use kitna sawab milta hai?
Khuda ne jawab diya:-
●Uski Maut me takhir kar deta hu
●Us par maut k sakaraat ka time (Maut se pahle ka time jo bohot sakht hota hai) aasaan karta hu
●Jannat k farsihte use aawaz denge : hamare taraf aao aur jis darwaze se jannat me dakhil hona chahte ho dakhil ho jao.
(Rauzatul waezin, Page 370, Mafatihul Hayaat, Page 212)

10. Imam Sadiq (as):
Sile Rahami se
●Acche padosi milte hai,
●Shahr aabad hote hai aur
●Umr lambi (tulani) hoti hai.
(Al-Kaafi, vol 2, Page 152, Mafatihul Hayaat, Page 212)

🌺Qat e Raham🌺
1. Imam Reza (as):
Allah ne Taqwa ko Sile Raham k saath banaya hai, bas jo bi Sile Raham nahi karta, Taqwa nahi rakhta, aur is wajah se uske acche aamaal qabul nahi hote
aur iske natije me uske duniya aur aakherat k kaamo me sakhti aur mushkilaat aati hai.
(Kitab al Khisaal, Page 156; Surah Maaida 27, Mafatihul Hayaat, Page 213)

2. Rasule Khuda (sawa):
Qat e rahmi se dua qabul nahi hoti hai.
(Mustadrakul wasael wa mustanbetul masael, vol 12, Page 334, Mafateehul Hayat (Urdu Edition), Page 199)

3. Rasul e Khuda (sawa):
Jo shakhs hamesha qat e rahmi karta ho us ka maal sharir(bure/kharab) logo k hatho qarar diya jata hai.
(Al-Kaafi, vol-2, page 374, Mafateehul Hayat (Urdu Edition), Page 199)

4. Imam Sadiq (as):
Wo gunah jo insaan ko jaldi fana kar deta hai, "qat e rahmi" hai.
(Maani al akhbar, al nass, page 270, Mafateehul Hayat (Urdu Edition), Page 199)

5. Rasul e Khuda (sawa):
Qayamat k din Allah Rahm ko bolne ki taqat dega to wo khuda ki baargah me ilteja karegi,
Khudaya! Us k saath ta’alluq jod jis ne mujh se ta’alluq joda aur us se qat e ta’alluq kar jis ne mujh se qat e ta’alluq kiya
pas jab wo shakhs k jo zahir taur par nek ho aur us ne achanak sile rahmi ko qat e rahmi me tabdil kar diya hoga, khuda k paas aayega, to use Jahannam ki aag me dala jayega.
(Al-kaafi, vol 2, page 156, Mafateehul hayat (Urdu Edition), Page 200)

Waledain/Gharwale (Hadith & Dua)

★QURAN
1. Waledain ki ita'at
Allah subhanahu wa ta'ala Quran me Sura e Israel (ayat 23) me fermata hai:-
(Khabardar waledain k jawab me) uff tak na kahna
aur na un ko jhidakna
aur (jo kuch kahna sun’na ho to) bohot adab se kaha karo.
(Mafateehul Hayaat(Urdu Edition), Page 213)

🔸🔹🔸🔹🔸🔹
★Hadith
1. Waledain ka AAQ kiya hua shakhs ka anjaam
Allah (swt) Hadith e Qudsi me farmata hai:-
Meri izzat wa jalalat ki qasam!
Agar waledain ka aaq shakhs tamam ambiya k barabar bhi ebadat kare, mai us ki wo ebadat qabul nahi karuga.
(Jame’us sa’adaat, vol 2, page 271
Mafateehul Hayaat(Urdu Edition), Page 214)

2. Waledain ko uff bhi na kaho
Imam Sadiq (a.s):
Aaq e waledain ka kamtarin martaba un ko uff kahna hai.
Agar koi cheez uff se kamtar hoti to khuda us se bhi mana farmata.
(Al-Kaafi, vol 2, page 348
Mafateehul Hayaat(Urdu Edition), Page 213)

3. Ghar waalo k saath bura suluk
Rasul e Khuda (sawa):
Badtarin shakhs wo hai jo apne ghar waalo k saath sakhti se pesh aaye.
Kisi ne poocha, ghar waalo se sakhti ka kya matlab hai?

Aap ne farmaya: Jab koi shakhs apne ghar me dakhil ho aur us k biwi bacche dare aur jab ghar se bahar jaye to biwi bacche khush ho. 
(Nahjul Fasahah, Page 538
Majmauz zawaed wa manbaul fawaed, vol 8, page 25 Mafateehul Hayaat(Urdu Edition), Page 226)

🔸🔹🔸🔹🔸🔹
🌴 Waledain k liye Imam Sajjad (as) ki dua🌴

♡Khudaya! 
Mere Waledain ko Khususiyat k saath apni bargah me karamat aur rahmat ata farma, ay bahtarin raham karne waale.

♡Bhala waledain mujh se apna pura (mukammal) haq kaha hasil kar sakte hai.
Mai to un k huquq k baare me soch bhi nahi sakta hu aur un ki khidmat k farz ko ada bhi nahi kar sakta hu.
Aur Khudaya!
➡️ Mujhe un ki yaad se ghafil na hone dena,
➡️ Na namazo k baad aur na raat k lamhaat me aur na din k waqt.

♡Khudaya!
➡️ Waledain k saamney meri aawaz ko daba de,
➡️ Mere kalam ko khush gawaar bana de,
➡️ Mere mizaj ko narm kar de
➡️ Mere dil ko maharbaan bana de,
➡️ Mujhe un ka rafiq (dost) aur un k haal par mujhe shafiq(compassionate,  kind) bana de.

(Dua e Imam Sajjad (as),
Mafateehul Hayaat, P.215-216)